سر نجاح تامر حسنى البنات ولا المراهقين ولا.......

بجد بجد بجد

لو قعدت اقول القسم دة بالذات واحشنى اد ايه والناس اللى فيه واحشانى اد ايه من هنا لبكره مش هيكفى

بجد انا فرحان اوى النهارده انى قدرت اخش وانزل توبيك لانى بجد كان بقالى فتره مقصر فى حق القسم دة اوى ويمكن فى حق السايت كله

بس معلش سامحونى كانت ظروف والحمدلله بدات تتظبط واول ما ربنا كرم وبدات تتظبط قولت لازم اخش اكتر قسم بحبه واكتر قسم الناس اللى فيه بحبهم

عارفين وانا قاد كدة مع نفسى فكرت فى حاجه كدة مش عارف ايه اللى جابها فى دماغى يعنى

كنت بسمع كذا البوم لـ كذا فنان وشويه كدة وبعد ما يمكن ما كنت حفظت كل الاغانى اللى فيهم بعدها زهقت منهم وقعدت كام يوم مش بشغلهم

ولما جيت شغلتهم بعد يومين بالضبط لاقيت نفسى مش فاكر ولا اغنيه منهم بصرف النظر مين الفنانين دول بس القصد ان انا حفظت الاغانى اه

لكن فين الاغنيه اللى علقت معايا؟ 5 البومات لو قولنا كل البوم 10 اغانى (ودة طبعا مابيحصلش دة فى البومات فيهم 16 اغنيه وفى منهم اللى اغنيتين بس)

بس هنقول كل البوم 10 اغانى يعنى 50 اغنيه حفظتهم كاملين لانى كنت بشغلهم على طول لمده كذا يوم والبوم اللى ماشغلتهومش فيه

نسيتهم جيت اشغل حاجه منهم كانى ماحفظتهومش ولا كانى سمعتهم قبل كدة

فين الاغنيه اللى علقت معايا؟

50 اغنيه ماحستش فيهم بـ ولا اغنيه وعلقت معايا وفضلت فى دماغى لـ اكتر من 48 ساعه على بعض معقوله ديه؟

قولت اشغل حاجه لتامر بالحظ كدة لاقيت اغنيه شكلى هحبك فاكرين الاغنيه ديه؟

لاقيت نفسى اوتوماتيك بغنى معاها بدون ما افكر فى كلمات بدون ما اكون حافظ الاغنيه بدون ما افكر الكوبليه اللى جاى ايه

اول ما اشتغلت نقلتنى لـ احساس تانى خالص وقعدت اغنيها مع تامر كانى على مسرح وبغنى قدام الجمهور بالضبط

اغنيه نازله فى البوم وسط اكتر من 10 مطربين البوم كان نازل فى سنه 20000

واحنا ناو فى 2010 يعنى بقاله 10 سنين نازل اغنيه نازله فى البوم زى دة تامر كان فى وقتها محدش يعرفه محدش سامع عنه

ومع ذلك اغنيه لولد جديد نازل وسط البوم فيه ناس جامده جدا تنجح فى الوقت دة بس كل دة عادى بتحصل لو المطرب كويس

لكن بعد سنه ولا اتنين بتتنسى وينزل الجديد ويتسمع وينزل الاجدد منه ويتسمع والقديم يتنسى وهكذا لكن اللى مش عادى

ان اغنيه تفضل عايشه بقالها اكتر من 10 سنين ولما تسمعها تغنى معاها وكانها لسه نازله فى البوم ماكملش يومين نازل السوق

قيس على كدة بقى كل اغانى تامر بلا استثناء قارن الحكايه ديه بشغل تامر من بعدها كله

لما فكرت فيها لاقيت حاجه مهمه جدا

الفنانين لما بيبقوا لسه طالعين بيبقوا بيعملوا احلى شغل لان نفسهم يتعرفوا ونفسهم يتشهروا بيعملوا حاجات قنابل بجد بتفضل معلقه كويس اوى مع الناس

بس بعد ما بيتشهروا بيشتغلوا اه وبيتعبوا اه لكن مش زى اول اغنيه ينزلوها او اول كليب يعملوه ابدا علشان كدة الجديد كله بتاعهم مابيبقاش اد كدة

لكن تعالى نبص بصه صغيره على شغل تامر

هاتولى حد مالوش اغنيه تامر بيغنيها بيحس انها قريبه منه حتى لو ماكنش بيحبه او مختلف معاه فى بعض الحاجات لكن برده بيبقى فى فى قلبه مكان صغير كدة لاغنيه تامر غناها كل لما يسمعها يقولك الله

اللى مخلى تامر بقى غير كل الناس ديه ان هو كل اغنيه بيختارها وكل البوم بيعمله بختارها باحساس الفنان الجديد اللى نفسه يعمل حاجه كويسه

بيغنى الاغنيه بـ احساسها المظبوط كانه لسه اول مره يقف قدام مايك ويغنى اغنيه ونفسه كل الناس تحب الاغنيه ديه

بيبقى عامل زى الطفل الصغير اللى نفسه يعمل حاجه ترضى اهله واصحابه واخواته وقرايبه وكل الناس اللى يعرفوه

بيتعب كانه لسه محدش يعرفه مابيحطش فى دماغه كلمه انا تامر حسنى او اانا نفسى ابقى احلى من فولان او او او

كل دة مابيحطوش فى دماغه بيتعامل مع نفسه كانه لسه محدش يعرفه ونفسه يبهر الناس بيه ويخلى الناس اللى تسمع الاغنيه ديه كانها بتسمع تامر لاول مره

علشان كدة بينجح علشان كدة الناس بتحبه علشان كدة هو بيفضل التوب دايما مهما حاول غيره انه يوقعه او يحبطه

و ورا كل دة يا جماعه وورا كل التعب اللى الراجل دة بيتعبه بيبقى فى واحده قاعده فى بيتها وساجده على سجاده صلاه

وبتدعى وبتقول يارب وفق ابنى وخليه احسن الناس

ام واقفه بـ قلبها ورا ابنها وبتسهر الليالى بتدعيله ربنا يوفقه ويحميه من شر الناس وكل الشرور اللى موجوده او ممكن تحصله

علشان كدة الانسان دة ناجح ولحد دلوقتى ناجح ولحد ما ربنا يريد ويفضل راضى عنه هو هيفضل ناجح وكل يوم نجاحه هيزيد اكتر واكتر واكتر

هو دة سر نجاح تامر لحد دلوقتى هما دول الحاجتين اللى بسببهم تامر ناجح بجد مش سبب نجاحه شويه بنات بتنطط زى ما بتقولوا ياللى غيرانين من نجاحوا انتوا

مش علشان فى شويه مراهقين بيتصوروا معاه وعاملينه نجم زى ما انتوا بتحاولوا تقنعوا نفسكوا وتقنعوا الناس

ونصيحه صغيره لكل حد غيران من تامر

لو مش هتقدر تعمل زيه يبقى ماتحاولش تتعب نفسك علشان تنجح لان بجد مش هتقدر